শেষ খণ্ড-সমাপ্ত [১০]-চুফিজিমত বাদ্যযন্ত্র বনাম অসমীয়া জিকিৰত টোকাৰী-

শেষ খণ্ড-সমাপ্ত 
[১০]“এক বৌদ্ধিক চিন্তা”

-চুফিজিমত বাদ্যযন্ত্র বনাম অসমীয়া জিকিৰত টোকাৰী-
………………………………………………………
“One of intellectual thought” [A colanguage Article]
-USE OF MUSICAL INSTRUMENT IN SUFISM vs TOKARI IN ASSAMESE JIKIR-
by:-sogoodislamsyeds-sgis
++++++++++++++++++++++

--সমগ্ৰ ভাৰতীয় উপমহাদেশতেই যেতিয়া ব্ৰাহ্ম্যণ্যবাদে বিয়পাই দিয়া জাত-পাতৰ বিভেদত জনসমাজ আছন্ন আৰু বৌদ্ধ ধৰ্মৰ বিভিন্ন মাৰ্গত বিচ্যুত জনজাতীয় সমাজ, সেইসময়তেই নৱ-বৈষ্ণৱ ধৰ্মৰ এছাটি মধুৰ বতাহে উত্তৰ ভাৰত-গৌৰ আৰু অসমৰ ওপৰেদি বৈ জন-সমাজক আকৃষ্ট কৰিবলৈ সক্ষম হয়। বংগৰ চৈতন্য দেৱৰ নৱ-বৈষ্ণৱ পন্থাত আকৃষ্ট অসমৰ বাৰভূঞা বংশৰ শ্ৰীমন্ত শংকৰদেৱে অসমতো ভাগৱতী বৈষ্ণৱ ধৰ্মৰ পাতনি মেলে। ব্ৰাহ্ম্যণ্যবাদে বৰ বিশেষ প্ৰভাৱিত কৰিব নোৱাৰা অসমৰ জন-সমাজত শ্ৰীমন্ত শংকৰদেৱে নিজৰ প্ৰতিভাৰ বলতেই জাতি-ধৰ্ম নিৰ্বিশেষে অসমৰ মানুহক আকৰ্ষিত কৰাই নহয় শিল্প-সাহিত্যৰ নৱ চেতনাৰে অসমত এক নৱজাগৰণৰো সূচনা কৰে। ভাগৱতী ধৰ্মৰ উদাৰতা আৰু মানৱতাবোধে অসমৰ জাতীয় সমাজখনত এক নতুন চেতনাৰ জন্ম দিবলৈ সক্ষম হয়।

ভাগৱতী বৈষ্ণৱ ধৰ্মৰ সাংস্কৃতিক প্ৰভাৱ অসমৰ বিশুদ্ধ ব্ৰাহ্ম্যণ্যপন্থী সকলৰ ধৰ্মীয় বিশ্বাস আৰু লোকাচাৰ সমূহৰ মাজতো একাত্ম হৈ এক অসমীয়া সংস্কৃতিক জন্ম দিবলৈ সক্ষম হয়।

--আজান পীৰ(ৰঃ) চাহাবৰ আদৰ্শ আৰু বৈষ্ণৱ আদৰ্শৰ মাজত নিকট সম্পৰ্ক বুলি ভবা হয়। একেই ভক্তি ৰস। ভক্তিবাদ আছিল ব্ৰাহ্ম্যণ্যবাদী আধিপত্য বাদৰ বিৰুদ্ধে প্ৰত্যাহ্বান। সেয়ে আজান চাহাবৰ জিকিৰ আৰু জাৰি গীতত দেখা যায় সেই একেই সুৰ—-মোৰ মনত হীন-পৰ নাই ও আল্লা, হিন্দু কি মুছলমান একে আল্লাৰ ফৰমান, যিদৰে গুৰু শংকৰৰ ভাষাত কুক্কুৰ শৃগাল গদৰ্ভৰো আত্মাৰাম,জানিয়া সবাকো পৰি কৰিবা প্ৰণাম। আজিও শংকৰ-মাধৱ গুৰুৰ বাৰকুৰি বৰগীতৰ লগতে আজান চাহাবে ৰচনা কৰা আঠ কুৰি জিকিৰ অসমীয়া ভাষাৰ অমূল্য সম্পদ। হয়। গুৰুজনাই দি যোৱা কীৰ্তন ঘৰ-নামঘৰ আনকি মণিকূটৰ স্থাপন শৈলীতো ইছলামীয় শিল্প শৈলীৰ প্ৰভাৱ উল্লেখ্য। আমনি কীৰ্তন ঘৰত গায়ন-বায়নসকলৰ এক বৃহৎ সংখ্যক ইছলামধৰ্মী লোকেই আছিল।

--আজান পীৰ চাহেবৰ বিষয়ে বুৰঞ্জীত বৰ বেছি পোৱা নাযায়। সম্ভৱতঃ ১৬৮৬ চন মানত আজান চাহাবে(ছাহ মীলান)এজন গোড়া মুছলমানৰ আদৰ্শৰে সুদূৰ বাগদাদৰ পৰা আহে। ভাৰতলৈ আহিয়েই তেওঁ চুফীবাদ আৰু ভক্তিবাদৰ সান্নিধ্যত আহে আৰু তেওঁৰ আগৰ ধাৰণা সলনি হয়। অসমলৈ আহি তেওঁৰ সেই ধাৰণা একেবাৰেই নাইকিয়া হয় আৰু গুৰু শংকৰে স্থাপন কৰা ভক্তিৰস প্ৰধান উদাৰ অসমৰ সমাজত তেওঁ বাণী প্ৰচাৰ কৰিবলৈ লয়। নিজে এজন মুছলমান হৈও গৌড়ৰ চোৰাংচোৱা বুলি সন্দেহ কৰি ৰূপাই দা ধৰাই আজান পীৰৰ চকু কাঢ়ে। অজানিতে এক অক্ষমণীয় অপৰাধ কৰি পেলালেও এজন অসমীয়া মুছলমানৰ স্বদেশ প্ৰেমৰ স্বাক্ষৰ ৰাখি গৈছে ৰূপাই দাধৰাই। কিন্তু পিছলৈ ভুল বুজিব পাৰি অনুশোচিত হৈ ৰূপাই আত্মঘাটি হয় আৰু স্বৰ্গদেৱে আজান পীৰক শৰাগুৰী চাপৰিত ভূ-দান দি তাতে সন্মান সহকাৰে স্থাপন কৰে।

    

-- শংকৰ-আজানৰ অসমত এতিয়া সাম্প্ৰদায়িক মেৰু বিভাজনৰ প্ৰচেষ্টা চলিছে। কিন্তু এই মেৰুকৰণ এতিয়াও সফল হব পৰা নাই একমাত্ৰ এই গুৰু দুজনাৰ অমৰ আদৰ্শৰ বাবে। যি আদৰ্শ অসমীয়া জাতিৰ হৃদয়ত লুইতৰ সোতৰ দৰে অহৰহ অবিৰাম গতিত বৈ থাকে। অসমৰ ইতিহাস শংকৰ-আজান- লাচিতৰ ইতিহাস, বাঘ হাজৰিকাৰ ইতিহাস। আজান পীৰৰ চকু কঢ়া বাবে ৰূপাই দাধৰাক সাহিত্যিক সকলে এজন মুছলমান মৌলবাদী হিচাপে অংকন কৰাৰ প্ৰচেষ্টা দেখা যায় যদিও সেই সময়ৰ অন্য সাক্ষ্য সমূহে তেওঁযে এজন প্ৰকৃত নিষ্ঠাবান দেশপ্ৰেমিক অসমীয়া সেনা বিষয়া আছিল সেয়া প্ৰমাণ কৰে। 

[References:-

1)ৰাজকুমাৰ সৰ্বানন্দ, ইতিহাসে সোঁৱৰা ছশটা বছৰ পূৰ্বোক্ত গ্ৰন্থ

2)চৌধুৰী মেদিনী,লুইত বৰাক আৰু ইছলাম

3)নেওগ মহেশ্বৰ,অসমীয়া সাহিত্যৰ ৰূপৰেখা

4)অসমৰ ধৰ্মীয় বৈচিত্ৰ্য, সহিষ্ণুতা আৰু সমন্বয়-ৰক্তিম শৰ্মা]
Link our site-http://wp.me/p2pDMO-1f-sgis

------------সমাপ্ত[১৭।০৫।২০১৫]sogoodislamsyeds-sgis-----------